陳煒的現任老公是誰？47歲低調嫁醫生男友

曾經歷過一段失敗婚姻，令陳煒更謹慎擇偶，同前夫顏志行離婚單身七年，煒哥去年才破Dry再拍拖，與同齡兼同樣有過失婚經歷的型男醫生陳國強（Aldous）撻著，愛得投入的煒哥，拍拖不久已表明身心都準備好，不排除會閃嫁。熱戀一年半，終被醫生男友細心體貼打動芳心，落實男友Mr Right地位，決定將同居關係升級，更計劃婚事，不過近期因新冠肺炎疫情影響百業蕭條，男友的醫務所生意亦受影響，生意淡泊要守業捱過難關，加上限聚令未知何時放寬，二人有共識低調註冊不會大搞婚禮，連度蜜月亦未有計劃，賢能貼地的煒哥幫準夫婿慳住荷包，低調慳嫁做醫生夫人一樣咁開心！

現年47歲出名親和順得人的陳煒，圈中人緣廣又有觀眾緣，近年擔正的劇集都大受歡迎，事業愈戰愈勇，愛情亦如魚得水，去年中與黃智賢（Ben）開設的醫美中心生意合夥拍檔陳國強醫生撻著，戀火一觸即發，拍拖以來愛得甜蜜，對女友體貼呵護備至的陳國強，更令曾經失婚的陳煒重拾對婚姻的憧憬！據知情者透露：煒哥對感情好認真，從來都唔會拍散拖，每次拍拖就會好投入，甚至會為對方放棄好多嘢，好似第一段婚姻，煒哥就因為嫁人息影，將所有精神同時間都放喺老公同家庭上，所以婚姻不如意，令煒哥有好長時間唔開心，同前夫離婚之後仲拖拉咗一段時間先至釋懷。Aldous就好唔同，佢好錫煒哥，煒哥做咩渠都好支援，知道煒哥鐘意演戲，渠會畀好多鼓勵女友，煒哥拍劇時間日夜顛倒，Aldous唔單止毫無怨言，仲好體貼寧願自己去遷就煒哥，唔介意做望夫石等煒哥收工！又會專登攝時間陪煒哥出埠工作，所以就算煒哥仲有野心事業上衝刺，亦唔會因為結婚而帶嚟壓力！

兩人感情一日千里，今年初醫生男友Aldous更搬入煒哥位於油塘的香閨過同居生活，經深入瞭解後，Aldous更覺同煒哥心意相通。據知情者透露：同居之後大家有更多時間相處，一齊生活感覺好直接，大家有咩缺點一目瞭然，渠兩個都離過婚，更識得去體諒對方同溝通，有咩亦會攞出嚟講，反而因為咁，令渠哋感情更深厚，覺得大家慨價值觀同睇法好一致，煒哥性格好溫柔，唔單止煮嘢叻，仲好識得照顧身邊人，令Aldous有好溫暖感覺，更加唔想錯過對方。